榴槤流星鎚

自從2006年巴士阿叔熱爆YOU TUBE,香港人出現咗一鋪隨街拍癮,"阿嬸大鬧機場","美心港女","我要食魚翅",到近期"旺角裸跑",同樣熱爆網絡!
以下呢則硬膠新聞,如果有人拍低,肯定好睇過女子泥漿摔角N倍:

「【本報訊】北角春秧街一間生果店，發生榴槤傷人事故。一名女顧客選購榴槤，懷疑切開後拒絕購買，與女店主發生爭執，兩人並用榴槤作武器互掟，結果兩敗俱傷，她倆涉嫌襲擊傷人被警方拘捕。

切開後拒購買起爭執
現時正值榴槤當造時節，春秧街 63號地下一間生果店，將榴槤擺放門外當眼地方，價目牌寫上泰國榴槤王、每個 25元及 20元以作招徠。由於榴槤飄香，吸引愛食榴槤者駐足門前選購。昨午 12時許，一名姓覃（ 41歲）女子，在生果店挑選榴槤。
據稱，生果店姓陳（ 35歲）女店東，落足嘴頭向顧客推銷，並聲稱「包開包靚」，覃婦揀選一個之後，着陳婦代為切開，但覃婦指該榴槤「唔靚」，聲言不會購買，並要求換另一個，女店東指有人存心「玩嘢」，兩名婦人發生爭執，互掟榴槤受傷，其後送院治理。」

時下香港人搵食艱難,政府管治又無能,累積大量怨氣,先則口角,繼而動武唔出奇,但搞到用榴槤互片,簡直開創打交招式之先河,我除咗O嘴,真係唔知講乜好!呢單硬膠新聞係藍田有條友深宵挪用公物洩慾導致"卡窿一索"事件以來,另一宗笑爆硬膠新聞!