單層電車

大家都有坐過電車,不過我問過好多朋友,10個有9個都話冇見過單層電車拖卡!(先旨聲明: 並非本人特別老,而係好多老過我嘅朋友都話未見過!)好,就等我呢個對巴士,渡輪,鐵路等大型公共交通有興趣嘅人同大家分享吓!

戰後60年代嘅香港經濟急速增長,人口亦愈來愈多,公共交通公具相應供不應求,而當時作為港島上主要交通公具嘅電車都唔例外!有見及此,電車公司開始引入單層拖卡列車,用作頭等車廂!由於廣受乘客及廣告客戶歡迎,高峰期一共有22輛拖卡於港島北沿岸川流行走!直到1982年,因為噪音問題而全數退役!

講多樣電車冷知識俾大家聽: 原來電車公司成立初期,曾經有計劃過喺九龍鋪設路軌投入服務,後來因考慮到當時九龍區人口不足,先至打消念頭.嘩!如果當年電車真係會進佔九龍,今日嘅彌敦道會係點?


圖為70年代灣仔莊士敦道,現今已面目全非,只有龍門大酒樓依然屹立!


圖為80年代初上環,披著MAXELL電芯廣告嘅單層拖卡,跟住一架雙層電車,於退役前依然"忠心"地服務島上市民,沿西行線向屈地街進發!