搬屋

近日同屋主湯美通知,佢要到花旗國跟愛人相宿相棲,咁我唯有要搵過間屋!搬屋真係一件煩事,除咗要搵合適地方,又要左pack右pack,到新屋入伙,更係執餐死!

由細到大,我已搬屋好幾次,不過令我最懷念嘅,就係我5歲前住嘅觀塘鯉魚門道村!

觀塘鯉魚門道村,又叫觀塘新村,即係現今鯉安苑所在位置.落成年份我唔太清楚,只記得於1997年拆卸.而已離開嘅爺爺,同我嫲嫲,爸爸等7兄弟姐妹全都喺呢個村成長.而我爸爸跟我媽婚後居於旺角,不過因為佢地要搵食關係,我一出世就交由爺爺嫲嫲照顧,所以我都住喺新村!直至5歲,我先由父母接回同住!不過我每逢學校放長假,都要一定返新村住幾日!

前文"您真超群"亦有提過,爺爺嫲嫲兩老錫到我燶,縱使小時候我野蠻任性,兩老亦照單全收,只要皇帝孫一扭計,都會有求必應!所以我曾經對朋友話,5歲前係我咁大個人最開心嘅日子!當然,呢段美好回憶一定同我新村舊居不可分割!而自我爺爺2年前仙遊後,我曾好幾次夢見佢,而"見面"地點,依然是那新村舊居!可惜我亦好遺憾,冇趁新村拆卸之前周圍影相留念!不過好彩有INTERNET呢樣偉大發明,慶幸可以俾我搵到新村舊相!

"觀塘新村"代表咗我童年無憂無慮美好日子,所以我喺FACEBOOK開咗個群組作為一個回憶平台,希望住過新村嘅舊朋知道,可以入嚟集體回憶一番!呀,唔知會唔會搵得番住同一層嘅幼稚園同學呢?

http://www.facebook.com/editphoto.php?oid=62488081041&success=1&failure=0#/group.php?gid=62488081041